पाऊस...

पाऊस आवडतो का तुम्हाला ?
उत्तर हो असणार अर्थातच!
मला खात्री आहे.


आता प्रश्न थोssडासा बदलते हं...
"पावसाळा" आवडतो का तुम्हाला ?
आता सगळे पट्कन हो नाही म्हणणार,
थोडा विचार कराल..


रोज नेमका ऑफिस ला जायला बाईक बाहेर काढल्यावर येणारा पाऊस आठवेल...


ट्रेन मध्ये नेमकी दारात जागा मिळाल्यावर धो धो कोसळून तुम्हाला चिंब करणारा पाऊस आठवेल...


आज काही पावसाचं लक्षण दिसत नाही, ऊन पडलंय, 
असं समजून आपण छान ऑफ व्हाईट पॅन्ट घालतो 
आणि बाहेर पडताच रस्त्यावरची सुकलेली माती भिजवून 
तिचे शिंतोडे त्या पँटवर उडवणारा 
श्रावणातला खोडकर पाऊस...

पावसाळ्याची हीच तर मजा आहे !
तो आपले ठरलेले बेत उधळून लावतो..
आणि अनेकवेळा ठरवूनदेखील करायच्या राहून गेलेल्या गोष्टी करायला वेळ देतो...

मी पाहिलंय,
सुट्टीसाठी ट्रॅफिकचं कारण एकवेळ कोणी ऐकून घेणार नाही,
कडक ऊन्हाचंही नाही;
पण पाऊस?
पाऊस कोणालाच चुकत नाही..
''केवढा पाऊस पडतोय!! कंटाळा आलाय",
हे कारण कुठेही सहज खपून जातं..
कारण तो कंटाळाही कोणालाच चुकत नाही..


कंटाळा पावसाचा नसतो,
खरंतर इतकं छान वातावरण असताना कराव्या लागणाऱ्या कामाचा असतो...

अशा वेळी ना, 
सरळ बाईकला किक मारावी
आणि हायवेला लागावं..
कितीही काँक्रिटचं जंगल असूदे आजूबाजूला,
आपल्याला मात्र त्यातून हळूच डोकावणारा पोपटी रंगच खुणावतो..
आख्ख्या रुक्ष दिवसाची तहान भागवणारा रंग, पोपटी..
हिरवा नाही बरं.. पोपटीच!
आभाळाच्या करड्या रंगावर चमकून उठणारा पोपटी...

पण एक मिनिट,
रस्त्यावर लक्ष असूदे हं...
बाईक चालवतोय आपण!
️